Deensdig 13 september goof S.V.D.-penningmeister Jo Philippi ’t ièrsjte exemplaar van de twiède drök aan burgemeister Daan Prevoo. TV Valkenburg waor hiebie prezent.
Watersja aan de beuk
St. Pièter
Veurzietter Francois Stevens lègk ’t oet. “Wie veer 10 jaor geleje de ièrsjte dieksjenaer geprizzenteerd houwe, dachte v’r dat veer genoeg beuk zouwe höbbe. Mèt bienao 500 rizzerveringe veuraaf waor ein derde deil van de oplaag al verkoch. Op ‘t ing van 2012 bleve nog 602 beuk in eige veurraod. En ouch in de jaore daonao verkochte veer nog hièl väöl beuk. Oze iezere veurraod loog opgesjlage op ’n veilige plek in de bieb. Meh es of ’t zoa haet moete zin, in ’t veurjaor van 2021 ies de veurraod verhuus nao ‘t souterrain van Tonny Bouwens op St. Pièter. De resterende hónderd vieftig sjtöks zin in de nacht van de 15e juli dao goon zjwumme en vervolges mèt hièl väöl ander sjpölle aafgeveurd. Dus door de waterramp verlore gegange.
En toen inins houwe veer nog ‘ne veurraod van tièn beuk. Natuurlek ies tiggewoordig hièl väöl digitaal besjiekbaar, ouch oze eigen dieksjenaer, meh dao geit toch nieks bove zoa ’n book in de kas. Dus höbbe veer konták gezog mèt oeze drökker/óntwerper van tièn jaor geleje. En dae houw nog ummer de besjtande besjiekbaar die nuèdig zin um obbenuujts te goon drökke. De S.V.D. ies bliej dat noe dees twiède, nog dieker verzie van d’n dieksjenaer kinne prizzentere. Aan de inhoud ies nieks veranderd, meh umtot diekker pepier gebruuk weurt ies de umvank get breijer. Mèt dees oetgaaf kinne veer waal wir tièn jaor veuroet.”
Goonsdeg 14 september kump e filmpke op dizze website van ’t presentere van d’n twiède drök aan burgemeister Prevoo en de toekómstige aktiviteite van de Sjtiechting.
Foto’s Fons Winteraeken, TV Valkenburg